Ditzionàriu in línia
de sa limba e de sa cultura sarda

bàlida , nf Definitzione su bàlere de una cosa Sinònimos e contràrios balidóriu, balimentu, valore, valuda Frases no at bàlida de ses dinaris Ètimu srd. Tradutziones Frantzesu valeur Ingresu value Ispagnolu valor Italianu valóre Tedescu Wert.

coràgi , nm: coràgiu, corazu Definitzione sa fortza de fàere calecuna cosa perigulosa, longa, difícile, peleosa, giusta, ue dhue at de tímere o fintzes solu de si pònnere atza, sa capacidade de arriscare; si narat fintzes in cobertantza o a disprétziu de sa manera de fàere de is isfacios e aprofitadores Sinònimos e contràrios alientu, atrevimentu, osadia / ttrs. curàgiu | ctr. timinzu, timoria Maneras de nàrrere csn: parare, fàchere corazu = chircare de crobare de ànimu, de si fàghere fortza in sas dificurtades, pro unu male, unu dannu; bestire, pònnere corazu a ccn. = animare, giare coràgiu, itl. infóndere coraggio; incorazindhe a unu: Coràgiu!; corazu bàrbaru = atrevimentu a fai mali mannu a unu Frases tui boga su coràgiu e fuedha! ◊ fit custrintu a parare coràgiu e a conca bàscia tucat fatu a su cumpanzu ◊ corazu no est solu a esser eroes (L.Marteddu)◊ para coràgiu, no timas! ◊ isco cales sunt sos trambucos in sa vida, ma su coràgiu de sighire no mi mancat ◊ corazu bàrbaru at tentu a bochire cudhu malevadadu! ◊ su coràgiu no est a facher gherras ma a si abbaitare in ocros un'impiegatu, unu carabbineri, unu giúdice o unu ricu fintzas chi si pisset (M.Pira) 2. arratza de corazu chi as tentu a mazare una criadura!…◊ bellu coràgiu a iscarrigai s'iscupeta apitzus de unu cristianu batiau!… Sambenados e Provèrbios prb: a tempus malu coràgiu forte Ètimu itl. Tradutziones Frantzesu courage Ingresu courage Ispagnolu valor, coraje Italianu coràggio, fortézza d'ànimo Tedescu Mut.

giúdu , nm: zudu Definitzione su serbire, su bàlere o èssere bonu de unu o de una cosa: si manígiat prus che àteru in sa nada èssere de g. / èssiri cosa de giudu = cosa de tzou, bonu, capatzu, àbbile, cabosu, de pòdere serbire, chi giuat Sinònimos e contràrios giuamentu, valore, valuda, zua 1 Frases at méritu pro àere fatu òperas de giudu (F.Paba)◊ ajó torrade, giòvanos de preséntzia e de giudu! (B.Trudhaju)◊ cussus no fadiant faina de giudu ◊ mamma ti biat manna, de giudu e de profetu! ◊ nci dh'ant ispotallitada, poita no fiat cosa de giudu! ◊ su istimentu fut pagu de giudu Ètimu srd. Tradutziones Frantzesu valeur, utilité Ingresu esteem, use Ispagnolu valor, utilidad, provecho Italianu prègio, utilità, giovaménto Tedescu Wert, Nützlichkeit, Vorteil.

valòre, valòri , nm: balore, valoru Definitzione su de bonu chi podet tènnere una cosa, su chi balet, cunsiderau fintzes, ma no sèmpere, coment'e prétziu contau in dinare Sinònimos e contràrios bàlida, balimentu, biatzesa / prétziu Maneras de nàrrere csn: v. reale = (faedhendhe de dinari), su valore chi tenet pro sa cosa chi còmporat; v. nominale = su valore inditadu de su númeru chi zughet sa muneda; cosa de valore = chi balit meda Frases sa cosa, candu est fata cun sudori, t’imparat a cumprendi su valori chi tenit (M.Pani)◊ sa balentia, su muntènnere sa peràula, su collire s'istranzu sunt valores de sa cultura sarda ◊ custa est cosa de valore, no la fides! ◊ no lis depo valore de unu sodhu ◊ s'isfortzu chi fait issu cun megus no tenit valori! ◊ isse chircat dirvagu solu in valores chi contant, comente sunt sa paghe e s'amistade ◊ po dh’arringratziai dhi at arregalau un'anedhu de valori ◊ custu terrinu at unu valoru mannu Tradutziones Frantzesu valeur Ingresu value Ispagnolu valor Italianu valóre Tedescu Wert.