Ditzionàriu in línia
de sa limba e de sa cultura sarda

isciarrócu , nm: isciorrocu, isorrocu 1, sciarrocu Definition su isciarrocai, idorrocare, betare o orrúere totu de mala manera; mescamente sa moida manna o fragassu chi faet sa cosa idorrocandho Synonyms e antonyms destrossa / ttrs. isciarada / isolocu 2. s'intendit isciarrocu in crésia: depint èssi movendi bancus ◊ sa brochera fait isciarrocu meda, trabballendi Etymon srd. Translations French écroulement, fracas English collapse, din Spanish derrumbamiento, estruendo Italian cròllo, fragóre, schianto German Einsturz, Krach.

iscontzadúra , nf Definition su isconciare, su isciusciare Synonyms e antonyms irfaghidura, sciusciada, sciúsciu, sfaimentu Etymon srd. Translations French écroulement English destruction Spanish destrucción Italian disfaciménto German Zersetzung.

ràza 1 , nf Definition su chi abbarrat de un'orroca chi cun su tempus che calat a crantos, is orrugos de sa pedra orruta de is orrocas / pedra lada Synonyms e antonyms pendéntili, tèrema / pradera, pràdica, pràica, tèglia Sentences sa pedra, trodhulendhe dae sa raza, est andhada a fèrrere finas a su riu ◊ ite bellas sas razas de su monte ch'illuminais maestosamente! (A.Paba)◊ che l'ant giutu fintzas a sa raza de su monte pro che lu betare dae sa roca Scientific Terminology slg Translations French écroulement, escarpement English sheer drop Spanish derrumbamiento Italian scoscendiménto German Absturz.

rúta , nf: arruta, irruta Definition su orrúere, su calare a terra a cropu de cosa istrantagiada o posta in artu, fintzes su fàere male po no tènnere sa fortza o coràgiu de si ndh'istare, de padire, agguantare Synonyms e antonyms arratroxa, istrampada Idioms csn: àerendhe sa ruta ei su tzurumbone, sa r. e sa trajinada = su dannu e su zúdigu, su dannu e sa befe, unu male subra de s'àteru; ruta de cadhu, de àinu = ruta, istrampada dae cadhu, dae subra s'àinu Sentences onzi passu una ruta e onzi ruta un'órchidu ◊ a sa ruta at fertu su bruncu ◊ in su paris l'assurtit una ruta e si truncat una cossa ◊ ruta e recaida 2. est mortu dae una ruta de cadhu Etymon srd. Translations French chute, écroulement English collapse Spanish caída, derrumbamiento Italian caduta, cròllo German Fall, Sturz.

sciarrocàda , nf: isciarrocada*, sciorrocada Definition su isciorrocai, distrúere totu, orrúere, betare o calare a terra de mala manera, pentzau mescamente coment'e movimentu; surra de cropos; tzàcurru mannu (es. de tronu) Synonyms e antonyms ilbarriada, irzarriada Sentences chi mi torras a atacai candu seu in prucissioni ti giau una sciorrocada de gruxi a conca! ◊ custu merí de ierru stramudiu calat cun sciorrocadas de àcua ◊ chi no nci andais si giau una sciarrocada de fusti! ◊ ch'istentat ancora dhi giau una sciarrocada de ferru de prenciai! 2. at fatu una sciarrocada de arrisu Translations French effondrement, écroulement English discharge Spanish derrumbamiento, descarga Italian scàrica German Entladung, Hagel.

sciarrócu , nm: isciarrocu, sciorrocu Definition su isciarrocai, betare a terra, nau de cosas mannas (domo, muru), o orrúere totu de mala manera, mescamente sa moida manna o tzàcurru chi si faet betandho a terra cosas deasi o iscopiandho calecuna cosa (es. mina); cosa sciorrocada, su chi abbarrat de un'òpera distruta / pròiri a sciorrocu = a strossa, de bírridu Synonyms e antonyms destrossa, isdobbiada, isolocu, sderrocu / smuroni / arruinali Sentences a comporai cussa cosa fait sciorrocu in su portafógliu! 2. sa temporada nd'est arribbada a sciorrocu ◊ no dhus intendis prus a cida santa is sciorrocus in crésia ◊ s'intendit sciorrocu de màchina ◊ su sciorrocu de unu tronu at incuriosiu su pipiu ◊ acant'a sa spéndula s'intendit su sciorrocu de s'àcua ◊ si est inténdiu su sciarrocu de sa mina 3. is domus bècias funt unu sciorrocu (G.Mura) Translations French écroulement, fracas English downfall, loud noise Spanish derrumbamiento, fragor Italian cròllo, fragóre German Einsturz, Knall.

sciusciàda , nf: issussiada* Definition su sciusciai, ma fintzes orruta mala a cropu, iscutulada / s. de àcua = bírridu Synonyms e antonyms irfaghidura, isfata, sfaimentu / arratroxa / abbísciu, issussionzu, tregonada Sentences su pirígulu de divisioni fut cumentzau apustis de sa sciusciada de su muru de Berlinu ◊ mi nc'est iscapau s'arrisu puru candu apu biu a Licu fadendu cussa sciusciada! Translations French écroulement, averse English undoing, downpour Spanish derribo, revés Italian disfaciménto, rovescióne German Zerstörung, Regenschauer.

sderrócu , nm: irdorrocu*, sdorrocu Definition su ndhe orrúere o betare calecuna cosa, meda, a cropu coment'e isconciandho e distruendho totu; s'efetu de su sdorrocai, sa moida manna, su tzàcurru o fragassu chi faet Synonyms e antonyms arruinu, derruta, desacatu, sderrota, sderruimentu / isciarrocu, mamudinu, sciumbullu, sculumerdu, stragambullu, torrocaxa, torrocu Sentences apu inténdiu su sdorrocu de comenti est arrutu in s'aposentu de letu: at móviu fintzas su letu e si at fatu un frincu in conca! Translations French écroulement, grondement English ruin, rumble Spanish derribo, fragor Italian rovina, boato German Einsturz, Getöse.