Ditzionàriu in línia
de sa limba e de sa cultura sarda

ciúcara , nf: tzúcara Definizione genia de pische de mare, piticu, cantu a una sardina ma prus grussu, unu pagu in colore birde, cun d-unu marcu niedhu in costaos, pintirighinos asulos, cun iscata chi a dha tocare est arrasposa Sinonimi e contrari ciàula, menduledha Terminologia scientifica psc, maena maena Etimo ctl. xucla Traduzioni Francese mendole Inglese kind of fish Spagnolo mena Italiano mènola Tedesco Laxierfisch.

cociobài , vrb: cociuai Definizione andhare a cricare o piscare cóciula Frasi apu biu genti meda cociobendu in Marcedhí ◊ cussu est cociuendi in ciú stagnu Etimo srd. Traduzioni Francese pêcher des arches Inglese to fish mussels Spagnolo pescar almejas Italiano pescare arsèlle Tedesco Muschel fischen.

mendulèdha , nf Definizione genia de pische de mare, piticu, cantu a una sardina ma prus grussu e ladu, unu pagu in colore birde, cun d-unu marcu niedhu in costaos, pintirighinos asulos, cun iscata chi a dha tocare est arrasposa: est unu pische innanti mascu – e faet su sèmene chi chistit in d-una busciuca – e apustis est fémina e faet is oos chi ingendrat cun su sèmene suo etotu Sinonimi e contrari ciàula, ciúcara, méndula* 1 Terminologia scientifica psc, maena maena Traduzioni Francese mendole Inglese kind of fish (maena vulgaris ) Spagnolo chucla Italiano mènola Tedesco eine Laxierfischsorte.

mogliòla , nf Definizione merdona de mare, genia de pische mannitu: est un'arratza de merulutzu Terminologia scientifica psc, phycis phycis Traduzioni Francese mostelle Inglese kind of fish Spagnolo brótola Italiano pastènula bruna Tedesco Mittelmeerfisch, der zu der Gadidae Familie gehört.

muscéllu , nm Definizione pisci saliu, pruschetotu petza de tunnina salia e asciutada Sinonimi e contrari musciamari Terminologia scientifica mng Traduzioni Francese filet de thon séché Inglese salt fish (generally prepared with tuna meat) Spagnolo mojama Italiano mosciame Tedesco Salami aus Thunfischfilets.

pàmpana , nf Definizione genia de pische mannu, de mare Sinonimi e contrari fànfara 1 Terminologia scientifica psc, naucrates ductor Traduzioni Francese poisson-pilote Inglese pilot fish Spagnolo pez piloto, pámpol Italiano fànfano, pesce pilota Tedesco Lotsenfisch, Pilotfisch.

piscadríxi , nf Definizione genia de pische mannu meda, a conca manna manna, chi abbarrat mesu cuau in su ludu o in s'arena de is fundhos de su mare Sinonimi e contrari piscadora Terminologia scientifica psc, lophyus piscatorius Etimo ltn. piscatrix, -icis Traduzioni Francese baudroie Inglese angler fish Spagnolo rape Italiano rana pescatrice Tedesco Seeteufel, Angler.

piscàe , vrb: piscai, piscare Definizione cassare e bogare de s’abba su pische o fintzes àteru, bogare css. de s'abba (o àteru deasi); umprire abba de logu fundhudu, pigare cosa a umpridura intrandho s'istrégiu a mesu, o fintzes pigare cosa coment'e faendho a piscadura, bogandho de un'istrégiu (es. billetes, cartas); nau in cobertantza, cassare o agatare a unu faendho dannu; fintzes furare / p. a cumpudu, a forrogu = a manuda; p. a fraca = farcai Sinonimi e contrari cassai / umpire / furai, leai Frasi partis su sero cun sa barca isperendhe bundhàntzia in su piscare ◊ si piscat bèni cun mari calmu e luna prena ◊ si piscat su pisci, su coradhu 2. seu pischendi àcua de funtana a cracira ◊ piscant s'abba chi servit in domo dae su putu ◊ su soru rúpidu si ndhe piscat a sas frussellas ◊ pisca sos macarrones ca sunt cotos! ◊ sa cosa cota si ndhe piscat dae su brou 3. dh'ant piscau comment'e unu traitori ◊ falat unu corvu e che li piscat sa berrita Cognomi e Proverbi prb: chini timit s'àcua no bandit a piscai ◊ chini arriscat piscat Etimo ltn. piscare Traduzioni Francese pêcher Inglese to fish, to catch Spagnolo pescar Italiano pescare Tedesco fischen, angeln, ertappen.

písce , nm: pische, pischi, pisci, pisse Definizione (upm, minudu o maduru chi siat, foras candho est precisau cun agt numeràriu) genia de animale chi faet in s'abba (de errios, lagos e mescamente de mare), prus che àteru longu, cun sa pedhe agiummai sèmpere ammontada a iscatas tostadas totu betadas a sa matessi bandha: po si mòvere portat una genia de alas in costaos, e in sa coa po cambiare bandha, arrespirat s'ossígenu de s'abba cun is gàgias o gragastas, est a ossu tostau, portat su pètene de s'ischina in mesu in mesu de sa carena e totu a ispinas longas apitzu e asuta, mentres chi àteras ispinas formant sa càscia (a bisura de costas) ue portat su matzàmene; po fàere su fedu portat e ponet sa cria o oos, est cricau meda po alimentu, chi est unu de is méngius: in logos adatos (istagnos naturales o impiantos fatos apostadamente) si pesat puru e a dónnia modu sa faina de dhu arregòllere (pisca) e trebballare est una parte de importu mannu de s'economia; dhue at àteros animales de abba chi narant pische ma chi, a diferéntzia, funt a ossu modhe, poderant is oos aintru de sa carena e ndhe faent su fedu prontu a nadare / min. pischighedhu, pissigedhu, pischigiolu, pischitedhu; partes de su pische: ispina, ganga o gàgia, iscata, barba, aletas (is pinnas in bentre), coa, elicis (pinnas acanta a sa coa, a manu de fundhu e a manu de pitzu), brentígliu, matza (istentina e figau), ispreni, feli, buciuca de s'ollu, buciuca de s'àcua (itl. vescica natatòria), ous, latúmini / genias de pische cun custu númene precisadu cun calecuna cosa: pisci àngiulu, arrúndili, cibudha, carabbineri, figu, gatu, ghitarra, ispada, luna, procu, stella Sinonimi e contrari piscadu Modi di dire csn: pisci de iscata = lissa, pische de Aristanis (ma fintzas àteras zenias de p., bastus chi zutant iscata); pisci a matza límpia = su chi si piscat a denote, candho no at pàschidu, e pro cussu zughet su matiguzu netu, saboridu meda a manigare; pisci in pardu = fàula manna, cosa de no crere; cúrrere che batu a pische = andhare a carchi cosa o logu chi piaghet meda; pisci a colletu (in suspu) = fae a budhidu; ischina de pische (nadu de logu) = serra de monte, astrinta e longa, chi betat abba a parte e àtera, a costazos ràbidos meda; tocai pisci ’e cadinu a unu = lèzereli sa vida, chircàreli chistiones o cosas personales, prus díligas; su p. de sa ruca = sonnighita, su babbautzu drommidu imboligadu in sa napa chi abbarrat de sa ruga; su p. de sa camba = piscioni Frasi pieneint duas barcas de pische ◊ cussu est pisci abbrorau, purésciu! ◊ abrontai una cassarola po còere su pisci! ◊ a manigare pische faghet bene ◊ a chenare mi apo cotu duos pischighedhos ◊ su pisc'e ispina no mi andat tanti: mellus prupu, sépia e cosas aici ◊ si sunt chenados a pisch'e iscata 2. dh'apu agatau fendi is ogus de pisci alluau cun d-una piciochedha! ◊ a sas festas bi curret zente che batu a pische ◊ auguramus chi umpare a su pische minudu in sa rete bi ruat pische mannu Cognomi e Proverbi smb: Pische, Pisci / prb: iscata de pisce, calcina noa! Terminologia scientifica anar, anall Etimo ltn. pisce(m) Traduzioni Francese poisson Inglese fish Spagnolo pez Italiano pésce Tedesco Fisch.

pischetería , nf Definizione butega, mercau chi bendhent pische Sinonimi e contrari pischeria / ttrs. pischitaria Traduzioni Francese poissonnerie Inglese fish shop Spagnolo pescadería Italiano pescherìa Tedesco Fischgeschäft, Fischmarkt.

scabbéciu , nm Definizione pische scabeciau / pei de bòi a s. = cotu a budhidu e cundhidu isossadu cun ozu e aghedu e unu pistu de predusímula e azu; olia a s. = cundhida, crua, a sa matessi manera Sinonimi e contrari scabeciada Frasi a papai at fatu pisci a scabbéciu Terminologia scientifica mng Traduzioni Francese poisson mariné Inglese pickled fish Spagnolo pescado en escabeche Italiano pésce marinato Tedesco marinierter Fisch.

scórpula , nf: iscrófinu*, scrópula, scrúpola Definizione genia de pische bonu meda po cassola, cun is barbas chi acabbant agiummai totu a ispina e punghent e dolet puru, cun crogorista ispinosa (in s'ischina): de mannària e colore diferente segundhu sa calidade Sinonimi e contrari scraponi Terminologia scientifica psc, scorpaena porcus, s. scrofa, s. notata Traduzioni Francese scorpène, rascasse Inglese scorpion fish Spagnolo escorpina Italiano scorpèna, scòrfano Tedesco Drachenkopf.

súrra 1 , nf Definizione su súmene de sa tunnina (mescamente sa s. bianca), bona meda orrostia Terminologia scientifica mng Traduzioni Francese thon à l'huile de première qualité Inglese tuna fish Spagnolo ventresca Italiano ventrésca, buzzonàglia Tedesco Bauchfleisch des Thunfisches.