Ditzionàriu in línia
de sa limba e de sa cultura sarda

múgghere , vrb: mugi, múgiri, mújere, múlgere, múlghere, múlgiri, múrgere, múrghere, múrguri Definition istrínghere sa tita a manos (o is tzimingiones, si est baca) o fintzes passare is tzimingiones in mesu de is pódhighes coment'e a tiradura a manera de ndhe fàere essire su late; nau de àteru, istrínghere cosa fintzes a atrotigadura a manera de ndhe dhi fàere essire abba o súciu; nau in cobertantza, isfrutare / pps. múlghidu, multu, muntu, murtu Synonyms e antonyms múgliri / atipriare, isciuciai / irfrutuare Idioms csn: m. a sa cadhigada = a s'imperriotu, ponindhe su fiadu suta de ancas e murghindhe a conca imbassiada a cara a betu contràriu; m. a cúcuru in culu = apispirinados in daisegus de su fiadu; múrghere a unu che chera de abbatu = isfrutaidhu, pigaindedhi totu sa cosa, acomenti faint is allurpius Sentences immoi mugeus is bacas ◊ murtas las azis sas berbeghes? ◊ ndh'at murtu duas, de berbeghes, in tantos annos chi fit pastore!…◊ como murghent fintzas a màchina ◊ murgiant a un'ipiolu ◊ is mannalissas si mulgiant in domu ◊ su babbu est mujenno ◊ cussa craba, candu dha mugint, imbrutat s'istrégiu!◊ custa manu mi dolet e no si dha fatzo a múrgere! 2. sa samunadora murghet sa robba samunada ◊ ti murgo a sa tatza su sutzu de un'arantzu ◊ sa lavatrice est murghindhe: candho faghet, istèrreche sa robba 3. ant postu sa giustíscia in movimentu pro la múrghere issos sa bidha! Scientific Terminology pstr Etymon ltn. mulgere Translations French traire, tordre English to squeeze, to milk Spanish ordeñar, exprimir Italian múngere, strizzare German melken, auswringen.

múgliri , vrb: mulli, múlliri, múxere, múxiri Definition istrínghere sa tita (o is tzimingiones) a manos o fintzes passare is tzimingiones in mesu de is pódhighes coment'e a tiradura a manera de ndhe fàere essire su late; nau de àtera cosa, istrínghere o trochigiare sa cosa a manera de ndhe fàere essire abba o àteru (fintzes iscúdere, pistare)/ pps. múgliu, múlliru, múlliu, múxiu / m. su giuncu = profizare e colare in carchi ata su zuncu (mascru) friscu pro lu triballare a lu fàghere a presorzos; múlliri is cambas = dòrchere, profizare de sa debbilesa (o pro irfortzu) Synonyms e antonyms iscrapicare, múgghere* Sentences su pastori dónnia dí depit acorrai e mulli is brebeis ◊ acorru is brebeis e dhas mullu: ma portant pagu lati… a candu mi acatu ca funta is duas de chitzi! ◊ fui muxendu sa baca de siu Danieli 2. dhi mullint is cambas ca su chi portat apitzus est tropu grai ◊ ti timu pagu e chi ti movis ti mullu cument'e unu giuncu! Surnames and Proverbs smb: Múlliri Translations French traire English to milk Spanish ordeñar Italian mùngere German melken.

mullimènta, mulliméntu , nf, nm Definition su múlliri, su trebballu de múrghere Synonyms e antonyms muglidura, multura, murghinzu Sentences su pastori at acorrau is brebeis po sa mullimenta ◊ nc'est passau in mesu de su tallu a s’ora de sa mullimenta e at isciumbullau is brebeis Etymon srd. Translations French traite, mulsion English milking Spanish ordeño Italian mungitura German Melken.

murghidúra , nf: murghitura, murgidura Definition su múrghere, nau fintzes de sa manera de fàere cosa (coment'e murghendho: fàghere a m.) Synonyms e antonyms muglidura, mullimenta, multura Sentences su tempus de sa murghidura ◊ custu est late de murghidura frisca Etymon srd. Translations French traite, mulsion English milking Spanish ordeño Italian mungitura German Melken.

murghínzu , nm Definition su múrghere Synonyms e antonyms muglidura, mullimenta, multura Sentences tocat a li dare una manu in su murghinzu ca est a solu ◊ su triballu mannu de su pastore est su murghinzu Etymon srd. Translations French traite, mulsion English milking Spanish ordeño Italian mungitura German Melken.