Ditzionàriu in línia
de sa limba e de sa cultura sarda

caràtere , nm: caràtile, caràtili, caràtiri Definition prus che àteru su naturale o naturalesa de su cristianu, ma fintzes arresurtau de educatzione e de imparu, bistu coment'e cumportamentu, maneras de fàere e de pentzare sérias, coment'e firmesa e seguresa de cumportamentu, naturale forte e síncheru / caràteres de istampa = líteras po iscritura de tipografia o de css. màchina, de bisura e genias diferentes Synonyms e antonyms naturale / firmesa Sentences cussu disonestu si at béndhidu onore e caràtere ◊ cussos sunt chentza caràtere: bae e fídadi, ti narant una cosa oe un'àtera cras! ◊ custa est fémina de caràtere e de sentidu ◊ su travàgliu li aiat acraritu su caràtile de s'ómine: unu cantu de pane! ◊ mi azis imparadu a no timire, a tènnere caràtere in donzi situassione e a mi ribbellare a sas cosas dortas (G.B.Fressura)◊ ti faint su bellu bellu ananti e sunt de caràtiri fraitzu prenus de ingannus! Translations French caractère bien trempé English temper Spanish fortaleza de alma Italian caràttere morale, fermézza nel pròprio comportaménto German Charakterstärke.

firmèsa , nf: frimmesa Definition su istare firmos, ma nau prus che àteru de sa manera chi unu tenet in su fàere, in su pentzare, candho est seguru, de unu matessi andhare fintzes in is dificurtades e no istat a su càmbia càmbia, abarrat oguale Synonyms e antonyms solidesa / arree, firmàntzia, frimmore / segurànscia, seguresa / imprastu, seriedade / cdh. filmesa Sentences conca de pagu firmesa, ti ses primau po nudha! ◊ su tempus no tenet firmesa ◊ sos conchi lezeris no ant frimmesa ◊ conca de pagu firmesa, cantus ndi bis ndi amas! ◊ sorti, ch'in su mundu no tenis firmesa, cumenti de tui mi potzu fidai?! Translations French stabilité, constance, fermeté English firmness Spanish estabilidad, firmeza Italian stabilità, fermézza, costanza German Stabilität, Festigkeit, Beständigkeit.

segurànscia, seguràntza, seguràntzia , nf: sicuràscia, sicuràntzia, sigurantza, siguràntzia Definition su èssere seguros de una cosa, su èssere una cosa segura, giare seguresa / po donzi bona siguràntzia = po èssere prus seguros Synonyms e antonyms arree, firmesa, seguresa, siguria Sentences sas pedras de su runaghe ponent segurànscia de antigória zenia ◊ totu in custa vida passat sena seguràntzia ◊ su naturali suu no tenit segurantza ◊ chirco un'aggarru de sicuràntzia chi mi mantenzat a pilu abba in su mare de sos sónnios (M.Piga)◊ si càmbias sa lampadina, po mellus siguràntzia istacu sa currenti ◊ cussos campant in sicuràscia ◊ in su mundu ita seguràntza nci at? Etymon srd. Translations French certitude, fermeté English certainty, firmness Spanish seguridad, fiabilidad Italian sicurézza, fermézza, affidabilità German Sicherheit, Standhaftigkeit.