Ditzionàriu in línia
de sa limba e de sa cultura sarda

aciapuài , vrb: aciapulai, aciapulare, assapuai, assapulai, assapulare, atapulare, atzapiai, atzapuai, atzapulae, atzapulai, atzapulare, tapulare*, tzapulai Definition betare o cosire tzàpulos a unu bestimentu, a unu trastu (o fintzes pònnere impastu a tretos in is muros); betare, imbolare, iscúdere a cropu, a istràmpidu, pigare a iscutuladas Synonyms e antonyms ammeditzare, apuntroxai, ataparatare, atrapuedhai, atrapulai, cosinzare, tzapugnire / addrobbulare, atapai 1, betae, fuliai, isciúdere, rúchere / assachitai Sentences is istimentos furint istampaos e atzapulaos ◊ si depiat acuntentai de is pantalonis de fustànniu atzapulaus in genugus ◊ ist cosindho e atzapulandho ◊ torrastis a domu timendi ca estis iscurriau is cracionis (e mamma dhus depèt aciapulai)◊ is istimentos istampaos dhos atzapulànt 2. atzàpulant carchi canterile, túnicant su locu 3. at assapulau su telèfunu chena arrespundi, de cantu fut arrennegau ◊ e totu gherra gherra nchi dh'intrant a s'aruta e dh'atzàpuant a terra (S.Baldino)◊ proit e s'istracia si atzàpulat a sa fentana ◊ nd'istudant su fogu atzapulendi sa fraca cun cambus de modhitzi ◊ issos no ant intesu s'atapulare de su coro meu ◊ càstia chini est aciapuendi a sa porta!◊ dhas at atzapuladas atesu ◊ sa pedhi nchi dh'apu atzapiada ca no balliat a logu ◊ si funt ispassiaus contendi totu su chi ant aciapuau apari in cià vira de issus Etymon srd. Translations French rapiécier English to patch Spanish remendar Italian rattoppare German flicken.

afioncài , vrb Definition trebballare a sa grussera, fàere male su trebballu, cun pagu incuru o cun pagu arte, nau mescamente de unu maistu Synonyms e antonyms aciapuciae, aciarollai, aciorobedhare, acoredhai, allarodhai, ammangiucai, apunghedhare, inciapugliare, indrovigare Sentences afionca, afionca… e apustis beni a ti pagai!… Translations French ravauder d'une façon grossière English to patch up Spanish chapucear Italian rinfrinzellare German verpfuschen.

afióncu , nm Definition acónciu, cosidura o tzapuladura totu fata male, trebballu fatu a improdhu, a afioncadura Synonyms e antonyms aciorodhu, impiastru, improdhu, inciapudhu, indróvigu / impipadura Etymon srd. Translations French ravaudage grossier English patch Spanish chapuza Italian abborracciaménto, frinzèllo German Pfuscharbeit.

ammeditzàre , vrb Definition cosire, betare tzàpulos a bestimentu segau Synonyms e antonyms aciapuai, aconciai, apuntroxai, ataparatare, atrapulai, tzapugnire Sentences at una beste betza e teves bídere comente l'at ammeditzada! Translations French rapiécier English to patch up Spanish remendar Italian rattoppare German flicken.

apipàre , vrb Definition arrangiare a sa bona pruscatotu bestimentu iscorriau Synonyms e antonyms aconciai, apitzare, arragnare, impipai, intipedhare, tapulare Translations French rapiécer English to patch (up) Spanish remendar, arreglar Italian rabberciare German zurechtflicken.

apitzadúra , nf Definition su apitzare, cosidura fata male, a sa bona Synonyms e antonyms afioncu, apipadura, impipadura Translations French ravaudage grossier English patch Spanish corcusir Italian raffrigno German Flickwerk.

apunghedhài, apunghedhàre , vrb Definition cosire a improdhu, coment'e faendho punghedhas, fatúgios, pònnere puntos fatos male; fàere punghedhas, pungas, bruscerias; fintzes pònnere sa punta de is peis, nau de is pipios cumenciandho a camminare e de chie ballat Synonyms e antonyms afioncai, atrapungare 2. cuss'imbroglioni mi at apunghedhau po mi ponni avatu is piciocus! Etymon srd. Translations French ravauder d'une façon grossière English to patch Spanish corcusir Italian rinfrinzellare German schlampig zunähen.

ataparatàre , vrb Definition pònnere o cosire taparatos Synonyms e antonyms aciapuai, ammeditzare, apuntroxai, atrapulai, tzapugnire Translations French rapiécer English to patch (up) Spanish remendar, zurcir Italian rattoppare German flicken.

ataparàtu , nm Definition taparatu cosiu, acónciu chi si faet a unu bestimentu istampau o segau Synonyms e antonyms apuntroxadura, tapuladura Etymon srd. Translations French rapiècement English patch Spanish parche Italian rattòppo German Flicken.

sàpuli, sàpulu , nm: ciapu, tàpulu*, tzapu 1 Definition orrugu de orrobba chi si cosit a unu bestimentu iscorriau; acónciu in s'imbussadura o ischedradura de unu muru (unu tretu piticu)/ ndi calat su celu a sàpulus = est proindhe a mal'istropiadura Synonyms e antonyms issàpuli, istràciu, napuitu, puntórgiu 1, taparatu Sentences po tui podiant erribbai bestius de sàpulis e a cuadhu de burrincu! ◊ portat unu giubbotu totu prenu de sàpulis Translations French pièce, rapiècement English patch, rag Spanish parche, trapo Italian pèzza, rattòppo, stràccio German Lappen, Flicken.

tapulàre , vrb: aciapuai, tzapulare Definition betare o cosire tzàpulos a unu bestimentu Synonyms e antonyms cosinzare, sartzire, tapuledhare, trabungare | ctr. irtapulare Sentences nois sas féminas bi amus de tapulare sas bestes ◊ Frantzischedha est in domo tapulendhe sa sacheta ◊ como no ndhe cherent mancu s'intesa de robba tapulada: finidu unu trastu si ndhe còmporant un'àteru Etymon srd. Translations French rapiécer English to patch Spanish remendar, zurcir Italian rattoppare German flicken.

tàpulu , nm: [su tàpulu = nr. sutàpulu] ciapu, sàpuli, tzapu 1 Definition orrugu de orrobba, pruschetotu orrugu chi si cosit a unu bestimentu o àteru po aconciare un'iscórriu, unu tretu ispaciau; ischedradura chi si faet in is muros in tretu chi sa bècia nd'est orruta o est orruendhondhe Synonyms e antonyms istràciu, puntórgiu 1, tzapulina / aconciadura, arràngiu Idioms csn: betare unu tàpulu = ghetai o cosiri unu tzàpulu, rebbucai; tàpulu de trovozu = bàlliu, tretu de trivozi; tàpulu de nie = tàpile, froca Sentences no teniat unu sodhu a comporare unu tàpulu ◊ donaisidha una pipia de tzapu! ◊ su tzàpulu est peus de s'iscórriu ◊ portàt me in bratzus una pipia de canna totu bestia de tzapuedhus, anninniendidha 2. in su tretu chi che andhat s'intúnigu, in su muru, cheret rasigadu e betadu unu tàpulu 3. dongu una passaredha de tzàpulu a sa scala, aici abarrat su logu límpiu 4. niat a largos tàpulos (A.Casula) Translations French rapiècement English patch Spanish parche Italian rattòppo German Flicken.

tzàpu 1 , nm: ciapu, sàpuli, tàpulu*, tzàpulu, tzàpuru Definition orrugu de istràciu béciu, orrugu de orrobba, pruschetotu orrugu chi si cosit a unu bestimentu o àteru po arrangiare un'iscórriu, un'istampu / min. tzapuedhu; tzapu de peis = corriolu de tela, petza de pè; tzapu de ortigu = orrugu Synonyms e antonyms istràciu Idioms csn: ghetai unu tzàpulu = cosire, pònnere unu tàpulu; fuedhai a buca de tzàpulu = faedhare coment'e a buca prena, de no si cumprèndhere bene su chi si narat; dogna tzàpulu bolit intrai in lissia = nau de unu coredheri chi boit manixai cosas difícilis; niai a tzàpulus = a froca lada, a tàpiles mannos; pàrrere unu tzàpulu cotu in sa lessia = zúghere sa cara che sa tela (de assuconu, de maladia) Sentences una màchina dh'at imbistida e iscavuada a terra cument'e unu tzapu ◊ at agatau una pipia de tzapus totu prena de agullas Translations French pièce de rajout English patch Spanish parche Italian tòppa German Flicken.