Ditzionàriu in línia
de sa limba e de sa cultura sarda

achídu , nm: achitu Definition agiudu, su chi si ndhe tenet o bogat, de bonu, de calecuna cosa; cosa chi si ponet po ndhe mantènnere un'àtera coment’e puntedhu, arraiga, o fintzes sustentu, alimentu; in cobertantza, dannu mannu Synonyms e antonyms agiudu, balanzu 1, lucru / arradicra, cerboni Sentences si mi dades achidu faghimus custa faina ◊ ne achidu e ne ondra ti istrinant daghi rues! 2. su sarmentu nou sentza achidu no si rezet ◊ debbilesa sentza achidu no dat cunfortu a sa mente (B.Asili)◊ tue tantu adorada lassas de domo su nidu, tue chi cun dulche achidu sos passos mi sustenias! 3. za l'at tentu s'achidu, siscuru, a che li mòrrere sa muzere!… Etymon srd. Translations French profit, avantage English advantage, profit Spanish provecho Italian ùtile, vantàggio German Nutzen.

antavàgiu , nm: antivàgiu, antivazu Definition su ch'èssere antibitzau in calecuna cosa, su tènnere de prus o méngius; cosa, cabbale, badàngiu chi si ndhe tenet o bogat de una faina o àteru; cosa chi si narat de bonu de ccn. a bàntidu Synonyms e antonyms avantàgiu, profetu, torracontu / bantaxu, bàntidu 2. cal'est s'antivàgiu chi ndh'apo àpidu pro ti àere a giuarzu? Etymon itl. Translations French avantage English advantage Spanish ventaja Italian vantàggio German Vorteil.

assusài , vrb Definition migliorare, cambiare in méngius, fintzes artziare is domos faendho àteru pianu Synonyms e antonyms addelantai, atelentare / ammellorai, impannitziri Sentences si est assusau su cixiraju maresu: at fatu domus bendendi cíxiri e caramellas ◊ sa fémina sàbia assusat sa domu, sa maca dha destruit ◊ assusit o no assusit, su messaju fait s'alimentu chi serbit po papai Etymon srd. Translations French tirer avantage, tirer profit English to take advantage, to improve one's own condition Spanish mejorar Italian avvantaggiarsi, migliorare la pròpria condizióne German einen Vorsprung gewinnen.

cóntu 2 , nm Definition cosa chi andhat bene, chi batit a un'arresurtau bonu Synonyms e antonyms gadagnu, profetu Idioms csn: torrare a c. = cumbènnere, godangiai, torrai paris cun su chi andat bèni; chentza c. e ne capu = pro nudha, in debbadas; a c. meu, tou, sou, nostru = a càrrigu meu, tou, sou, a bandha, indipendhente, a manera chi donniunu nci pentzit cussu etotu a is cosas suas; tènniri, tennirisí a c. = arregalaisí, abarrai cun Deus, a istare bene, leàresi incuru, dare c., contivizare, fai atentzioni a ccn. cosa; dare c. a su bisonzu = andai avatu de s'abbisóngiu; a dónnia c. = de onzi manera Sentences cun contu l'amus fata sa essida: inoghe ch'est sa morte e no sa vida! (Grolle)◊ custa cosa no nos torrat a contu: ispendhimus meda e balanzamus prus pagu ◊ a mie no mi torrat a contu, no, a istare ispetendhe perdindhe tempus! ◊ no b'at ne contu e ne cabu a fàghere cosa gai ◊ custa cosa no est contu bonu: tantu triballu pro nudha! 2. donzi pópulu depet èssere a contu sou ◊ una bella dí si fut arrósciu de si fai cumandai e iat decídiu de trebballai po contu suu ◊ fia teracu anzenu ma apustis mi so postu a contu meu ◊ istúdia, fizu meu, ca su travallu a contu anzenu est unu pesu meda mannu! 3. bah, teneisí a contu: dèu mi ndi andu! ◊ adiu, Nanne: tènedi contu! ◊ mi fait su prexeri de mi tenni a contu su cuadhu cantu abarru a mi ascurtai sa missa? ◊ chie cheret podet dare contu a carchi pitzinnu ◊ no bi aiat dadu contu finas a tandho chi cudha pitzinna fit bella e modosa ◊ si no istabant a contu, su bentu lis allughiat sas piatzas e lis brusiabat su carbone ◊ si fit a dare contu a su bisonzu no si tiat fàchere mai nudha ◊ portat a contu a chie passat 4. - E comenti ti dha passas? - A dónnia contu! Translations French avantage English profit Spanish ventaja Italian conveniènza, vantàggio, benefìcio German Vorteil.

cumbeniéntzia , nf: cumbiniéntzia, cuminiéntzia, cunviniéntzia Definition cosa chi cumbenit, chi dhue at torracontu, badàngiu; trastu o àteru chi serbit a fàere calecuna cosa a discantzu Synonyms e antonyms torracontu / codomidade, cumbénia Sentences nosu iaus a bolli totu a cumbiniéntzia nosta! 2. sos àteros tenent sas cumbeniéntzias e no picant s'issilíssiu chi pico deo trabballandhe ◊ s'abba intro de domo, sa lughe elétrica, sa màchina, su telèfono sunt totu cumbeniéntzias de oe Etymon spn. conveniencia Translations French avantage English suitability Spanish conveniencia Italian conveniènza German Angemessenheit, Vorteil.

giuaméntu , nm Definition su giuare, su serbire a calecuna cosa de bonu, fàere bene Synonyms e antonyms giudu, ingiuamentu, probamentu, prode, próigu Sentences custa mexina no fait giuamentu perunu Etymon srd. Translations French avantage, utilité English benefit Spanish provecho Italian giovaménto German Nutzen.

lúcru , nm: lúcuru Definition torracontu, profetu, benefíciu, arresurtau bonu chi si ndhe tenet de calecuna cosa Synonyms e antonyms badagnu, balanzu 1, gadagnu, gagnu, gualanzu, ingogna, profetu, torracontu | ctr. pérdia Sentences sos terrinos no dant lucru mancu a sos pastores ◊ de su tou malu operadu, ite lúcuru ndh'as tentu? ◊ bae a istudiare, fizu meu, e assumancu chi siat cun lúcuru! ◊ a ite tiat èssere a triballare chentza lúcuru?! ◊ si no mi aggantzas a díligu a díligu dae me no ndhe bogas lúcuru meda Etymon itl. Translations French gain, lucre, avantage, profit English gain, profit Spanish lucro, provecho Italian lucro, profitto, vantàggio German Gewinn, Vorteil.

próigu , nm Definition totu su chi est de bonu, de agiudu, chi faet bene, proe Synonyms e antonyms giuamentu, probamentu, prode Sentences si faghes custu già est a próigu e biadia tua ◊ de totu su chi faghet no ndhe tenet próigu perunu Etymon srd. Translations French avantage, soulagement English relief Spanish provecho, beneficio Italian giovaménto, ristòro German Nutzen.

torracóntu , nm Definition cosa chi torrat a contu, cabbale, badàngiu, frutu, cosa de bonu chi si ndhe tenet fintzes in su sensu de andhare méngius, de èssere prus cumbeniosu Synonyms e antonyms badagnu, gadagnu, gagnu, gualanzu, lucru, profetu / cumbénia | ctr. pérdua Sentences sa zente crobaiat prus torracontu a si leare cartzamenta fata Translations French avantage, profit English profit Spanish interés, provecho Italian tornacónto German Nutzen.