Ditzionàriu in línia
de sa limba e de sa cultura sarda

ibbariòne , nm: ibarione, irbarione, irvarione, isvarione, ivarioni Definitzione su chi si narat o chi si faet candho unu est fora de sèi, ammachiandhosi, candho est a callentura arta meda; fintzes cosa fata in fadhina po sa paga atentzione, ibbàlliu mannu Sinònimos e contràrios avarioni, istentériu, isvarionzu / ttrs. ivariumu Frases mi ant inferchidu a rosas sos lidones pro mi ghelare sa mente de profumu, ma fint irbariones, bentu e fumu 2. perdona si in custu tribàgliu bi at imbàglios e isvariones Tradutziones Frantzesu délire, radotage Ingresu raving, empty talk Ispagnolu desvarío, vaniloquio Italianu vaneggiaménto, vanilòquio Tedescu Irrereden, leeres Gerede.

ilvàriu , nm: irbàriu, irvàliu, irvàriu, isvàriu Definitzione su essire de sa normalidade, su no èssere normale, fàere machines, su no ammentare, su cambiare a machine, àere istrobbu Sinònimos e contràrios ammàchiu, avarioni, badalocu, disvàriu, ibbarione, iscàsciu, istentériu, isvarionzu, vadiore / irballu, irbortu, isdrobbu | ctr. sabiesa Maneras de nàrrere csn: àere i., pònnere in i. = irbariare, ammachiaisí, fai ammachiai; i. de amore = pèrdiri sa conca, ammachiaisí po ccn. o calicuna; si no apo i. = si no arregordu mali, si no tengu istrobbu; fàchere caminu irvàriu = fai moris fadhitus (e fintzas su matessi caminu a su contràriu) Frases ognunu in tantu isvàriu chircat e no agatat un'iscampu ◊ s'ispesa tropu manna lis at fatu a irbàriu ◊ cuss'irvàliu mannu chi est s'amore ◊ ello cust'irvàliu candho ti est bénniu a conca? 2. no naro, no conto isvàriu: est beridade connota! ◊ a donzi passu fatat un'isvàriu e s'iscollet in cantos passos ponet! 3. si no apo ilvàriu, cras depo partire Ètimu itl. disvario Tradutziones Frantzesu bêtise, radotage Ingresu frenzy, crazyness, being beside oneself Ispagnolu desvarío Italianu delìrio, insensatézza, l'essere fuòri di sé, sviaménto Tedescu Fieberwahn, Unbesonnenheit, Verirrung.

iscioródhiu, iscioródhu , nm: scioródhiu Definitzione cosa chi narat unu chi no est arrexonandho bene, chi est pagu giustu de crebedhu, chi no est atinandho Sinònimos e contràrios dellíriu, ischíssiu, varione Ètimu srd. Tradutziones Frantzesu radotage Ingresu delirium Ispagnolu delirio, desvarío Italianu farnètico Tedescu Irrsinn.

istentériu , nm: stantériu Definitzione cosa, chi si narat o chi si faet, chi no tenet fundhóriu, machine; su istenteriare Sinònimos e contràrios avarioni, badalocu, dellíriu, desatinu Frases sos betzos tzicant sérios e no intrant in parte a faedhare de custos istentérios 2. fint una dilgràscia sos istentérios de sa frebba de sa malària ◊ istentériu dhi at carau! Ètimu srd. Tradutziones Frantzesu radotage Ingresu delirium Ispagnolu delirio, desvarío Italianu farneticaménto, farnètico Tedescu Irrsinn.