Ditzionàriu in línia
de sa limba e de sa cultura sarda

allústra , nf, nm: allústriu, allustru, lustra* Definitzione genia de pasta o crema chi si frigat po fàere lúghida calecuna cosa (mescamente pedhe) Sinònimos e contràrios illustru Frases teniat allústriu de butinus po bendi ◊ po giogai a peincaredhu si ghetat una perda ciata o un'iscàtula de allustru Tradutziones Frantzesu cirage Ingresu shoe-polish Ispagnolu betún, crema para el calzado Italianu lùcido per scarpe Tedescu Schuhcreme.

baltzànu , agt, nm: batzanu, brassanu, bratzanu Definitzione si narat de animale chi portat su cambúciu, o àteru arremu (fintzes ogu) de colore diferente s'unu de s'àteru; est númene chi ponent a su cane puru; nau de persona, chi no faet a si fidare, trassera, metzana / su brassanu = su pè (s'ungredha) de su cadhu, de sa baca Sinònimos e contràrios pearbu, pedibbellu / allabentinau, baltzaneri, trasseri, stramu Frases brassanu a unu, a duos, a tres, a bàtoro pes, a pes de nanti, de segus, a pes vicànicos 2. su brassanu bratzu sou crudele e assassinu at fatu subra mia disatinu! ◊ no ti lessas ingannare dai cussu brassanu! ◊ dae tentu, mighi cussu est brassanu! Terminologia iscientìfica ntl Ètimu itl. Tradutziones Frantzesu balzan Ingresu white-footed horse Ispagnolu calzado, manchado, armiño Italianu balzano Tedescu weißgestreift, wunderlich, Sonderling, unzuverläßiger Mensch.

caltzàdu , pps, agt: cartadu, cartziadu Definitzione de caltzare; chi portat is iscarpas postas; nau de un'animale (boe, cuadhu, molente), chi dhi ant postu is pinnas o ferru in is peis Sinònimos e contràrios ferradu | ctr. isciurtzu 2. caltzadu cun botas fit ◊ in coana de carru si bidiat unu pè cartadu chin d-unu bote a tapadinu ◊ bestiu e cartau a nou, est andhandhe a domo de s'amorada Tradutziones Frantzesu chaussé Ingresu shod Ispagnolu calzado Italianu calzato Tedescu beschuht.

caltzamènta , nf: cartzamenta Definitzione trastu fatu in forte de bestire in is peis Sinònimos e contràrios caltzinzu, cartzadura, cosíngiu / cdh., caltzamentu Frases sa zente crobaiat prus torracontu a si leare cartzamenta fata ◊ zughet sa cartzamenta chentza corrias Terminologia iscientìfica bst, sbb Ètimu srd. Tradutziones Frantzesu chaussure Ingresu footwear Ispagnolu calzado, zapato Italianu calzatura Tedescu Schuh.

càrtu , nm: cartzu Definitzione trastu fatu in forte de bestire a is peis Sinònimos e contràrios caltzamenta, caltzinzu, cartzadura, cosignu Frases ocannu mi cheret cartu nou, ca sas iscarpas chi tenzo sunt betzas ◊ irveta ca mi vesto sa camisa e mi prendho su cartu! Sambenados e Provèrbios smb: Cartigheddu Ètimu srd. Tradutziones Frantzesu chaussure Ingresu shoes Ispagnolu calzado Italianu calzatura, scarpe Tedescu Schuh.