fógiu , nm: fógliu, follu, foxu, fozu Definitzione orrugu de paperi fine, pruschetotu po iscríere o cun cosa iscrita o fintzes pígiu fine de ccn. àtera cosa; documentu, paperi; sa parte lada cun s'atza de is lepedhas / min. fozolu Sinònimos e contràrios dochimentu / frama 1 Maneras de nàrrere csn: fàghere sos fozos = fai is paperis, sos dochimentos; cambiai fógliu = fàghere àteru, cambiare pàzine Frases badiandho su bestiàmini seo ligendho dónnia fógiu chi mi capitat ◊ custe abberit bete libbru e colat su pódhiche a torchietes in paritzos fozolos ◊ cudhu sennore che at ghetau sos fozos a intro de sa bússia e si ch’est andhau 2. apu biu ca no mi torràt a contu e dh'apu cambiau fógliu! 3. portat sa lepa abburinada in su follu Ètimu itl. Tradutziones Frantzesu feuille Ingresu sheet Ispagnolu hoja Italianu fòglio Tedescu Blatt, Bogen.

frèsa , nf, nm: fresu 1 Definitzione donniunu de is duos pígios de su pane carasau, o fintzes custa genia de pane; pischedhu o làmpina de casu (e fintzes de arrescotu) laditu / f. de ou = oidedhu abbatadu cun túcaru, ispíritu de ou Sinònimos e contràrios màtula Frases si at manigadu duas fresas de pane cun casu ◊ su pane de fresa est lísiu a parte de fora (ca est tesu), ma aspru intro (ca sos pizos s'ispítzigant desesi coghindhe) Ètimu srd. Tradutziones Frantzesu abaisse Ingresu sheet of pastry Ispagnolu masa en hoja Italianu sfòglia Tedescu Blätterteig.

lantzóru , nm: lenciou, lencioru, lensolu, lentolu, lentzolu, lentzoru, letolu, letzolu, linciolu, lintolu, lintzolu Definitzione telu mannu de orrobba fine chi si ponet a su letu, a duos pígios (lentzolu de asuta e lentzolu de asuba chi si arrebbucat), intremesu de banita e cobertas / allonghiai su pei cunforma a su lenciou = ispèndhere o fàghere su chi si podet; Maria lentolu = M. letolada, letolache, unu èssere fatu a pessamentu pro fàghere a timire sos minores Sinònimos e contràrios nentzolu Frases s'isposa cumenciaiat a preparare su corredo, filaiat su linu po dhu tèssede, cosiat tiàgias, lentzolos ◊ a su mortu dh'iant trogau in d-unu lantzoru ◊ bi teniat fressadas de lana pesosas e letolos de linu ◊ in pizos de lentolu est chirchendhe consolu…◊ mi ant zau billetones mannos, parent lintzolos!◊ portas lentzoru crutzu e po ammantai sa conca t'iscoberis is peis ◊ fui acanta de su fogu ricamendi unu lenciou candu ant bussau ◊ festus lantzorus e pannixedhus de linu Ètimu ltn. linteolum Tradutziones Frantzesu drap Ingresu sheet Ispagnolu sábana Italianu lenzuòlo Tedescu Betttuch.

«« Torra a chircare