fèrrere , vrb: ferri, fèrriri Definitzione su tocare calecuna cosa o a ccn. a cropu cun cosa chi si faet a iscudidura: prus che àteru si narat candho su cropu faet male, dolet, o faet dannu, lassat su singiale, ma s'impreat fintzes solu in su sensu de tocare e fintzes de iscúdere / pps. fertu Sinònimos e contràrios corpare, ingolli, ingrimi / tocai / atripai / ammachiae Maneras de nàrrere csn: fèrriri cun aciotus, fèrriri in plenu, fèrriri sa mira; fèrrere a ocru = pònniri ogu Frases no cherzo chi ti ferzas, gioghitendhe gai in modu isciàpidu ◊ fiat unu pillonedhu fertu a s'ala ◊ si est fertu seghendhe linna: azummai si fit istropiadu! ◊ che li at iscutu una nae a cambarinu ma no l'at fertu ◊ at isparadu a perdigones ma no ndhe at fertu mancunu, de puzone ◊ abí nci fiat ferta sa perda fiat nàscia un'ísula ◊ apo fertu su bratzu a su muru ◊ sa fortuna fait che tiru de managu: aundi ferit ferit! 2. su calore che ferit atesu ◊ acúrtziadi, ca no ti ndhe ferit de fogu! ◊ su tallu mériat po no dhi ferri soli pitziosu ◊ mabadita sa luxi chi dhi ferit! ◊ su bentu ferit is frutas ◊ lah chi no fèrgiat àcua a is follas candu àcuas sa matixedha! 3. custu macu pigat unu fusti e bandat a ferri su lori: dhi at donau una surra!… 4. amorados ndhe aias una chedha, ma fertos ti los ant a oju malu Ètimu ltn. ferire Tradutziones Frantzesu frapper, blesser Ingresu to hit, to injury Ispagnolu golpear, pegar, herir Italianu colpire, ferire Tedescu schlagen, verletzen.

fèrrere 1 , vrb: ferri, fèrriri 1 Definitzione lòmpere, arribbare, andhare a finire in calecunu logu / pps. fertu, fértidu Sinònimos e contràrios afèrrere, imbàtere, lòmpere Maneras de nàrrere csn: fèrreresi apare = pònnere de acordu, pònnere a fàghere cosa paris; fintzas a ube ferit ocru = atesu a cantu si arrennescit a biri, a cantu afiet ogru; fèrrere fogu a ccn. = lòmpere caentu de fogu, sentire su calore de su fogu Frases padentes de suberjos si perdiant fintzas a ube feriat ocru ◊ fertu ch'est in Planàrgia e giradu at s'Anglona ◊ che frundha fúrridu ch'est fértidu in sas chimas de Limbara ◊ fit abbaidendhe a cantu podiat fèrrere oxu ◊ in duas oras che so fertu inie ◊ andhat arrúmbula arrúmbula e feriveri ◊ gai atesu no ti ferit fogu: acurtziadindhe! 2. nois nos ferimus apare, duos o tres pastores, e ti torramus a fàchere sa gama Ètimu ltn. ferre.

«« Torra a chircare